Në kuadër të muajit të ndërgjegjësimit kundër kancerit të gjirit, njësitë e lëvizshme kanë ndaluar në Prezë të Tiranës duke ju mundësuar grave dhe vajzave të kësaj zone kryerjen falas të mamografisë.
Ministrja e Shëndetësisë dhe Mbrojtjes Sociale, Albana Koçiu dhe ministrja e Bujqësisë dhe Zhvillimit Rural, Anila Denaj zhvilluan edhe një bashkëbisedim me gratë e vajzat e fshatit Prezë lidhur me rëndësinë e kontrollit periodik dhe të ekzaminimeve të nevojshme jo vetëm gjatë “Tetorit Rozë”, por edhe në muajt e tjerë të vitit.
Ministrja Koçiu inkurajoi vajzat dhe gratë që t’i kushtojnë kohë vetes dhe shëndetit të tyre, të shkëputen disa minuta nga angazhimet e përditshme dhe të kryejnë kontrollet sipas rekomandimeve të mjekut të familjes.
”Është tetori muaji në të cilin flasim për këtë sëmundje që për fat të keq vjen e shtohet gjithnjë e më shumë. Ama ka një lajm të mirë. Nëse ne arrijmë ta diagnostikojmë në kohë tumorin e gjirit, 99% e rasteve janë të kurueshme. Kjo na tregon sesa rëndësi ka që ne të diagnostikohemi në kohë, të gjejmë pak kohë për veten dhe të bëjmë një eko gjiri, një mamografi sipas rekomandimeve që na jep mjeku i familjes”.
Ajo apeloi edhe për kryerjen që nga mosha 35-40 vjeç të ekografisë së gjirit një herë në vit dhe nga mosha 50 deri në 70 vjeçe të mamografisë një ose dy herë në vit.
“Ne kemi zgjedhur këtë vit sloganin “Ia vlen të jetosh”, si një dialog apo monolog me veten tonë, por edhe si vlerësim se për çfarë ia vlen të jetosh. Ia vlen edhe për ato momentet dhe kënaqësitë e vogla të të përditshmes, për atë përqafimin e fëmijëve, për ato rrezet e diellit, për këtë natyrë të mrekullueshme ku jetoni. Le t’i kthejmë sytë nga vetja dhe të mendojmë njëherë për veten tonë”, u shpreh Koçiu, duke shtuar se ky është një mesazh që duhet t’ua përcjellim të gjitha grave, vajzave dhe nënave tona që të marrin pak kohë nga vetja dhe të kryejnë mamografinë falas.
Ministrja e Bujqësisë dhe Zhvillimi Rural, Anila Denaj falënderoi ministren Koçiu dhe ekipin e MSHMS-së që mundësuan kryerjen e mamografive falas edhe për gratë dhe vajzat në Prezë.
“Kemi ardhur në një ditë kaq të rëndësishme siç është Dita e Gruas Rurale, në një muaj kaq të rëndësishëm siç është muaji i tetorit rozë e ku është një muaj që na bën të ndalojmë të gjithave dhe të mendojmë se çfarë vlen. Gruaja në zonën rurale ka shumë më tepër punë, angazhim qoftë edhe vështirësi se një shi bie ikën gjithë ai mund dhe sakrifice. E përmendi ministrja, që sot informohesh më kollaj se sa më parë, por nga ana tjetër, por edhe vendin ku mund të shkosh ta bësh këtë konsultë e ke më afër sesa më përpara. Sot po të vjen më afër shtëpisë, nëpërmjet mamografisë lëvizëse. Edhe një herë unë ju falenderoj shumë për punën, për përkushtimin. Kështu që, në një ditë kaq të rëndësishme të gruas rurale, një duartrokitje shumë e fortë nëse mund ta japim tani për të gjithë grate në të gjithë Shqipërinë, të cilat janë nëna, motra dhe me shumë sakrificë, por mbi të gjitha sjellin këtë prodhim që ne ushqehemi me kaq shumë cilësi dhe vlera”, u shpreh Denaj.
Gjatë gjithë muajit tetor, MSHMS ka mundësuar që të gjitha gratë dhe vajzat të kryejnë ekzaminime falas nga dita e hënë në të premte, ora 8.00-20.00 dhe të shtunën, nga ora 9.00-14.00 në spitale apo qendrat pranë vendbanimit. Gjithashtu, përmes e-Albania, vajzat dhe gratë e moshës 30-70 vjeçe do të njoftohen dhe ftohen për të bërë ekzaminimet e nevojshme si dhe kryerjen e mamografisë së radhës.